- Author, Komla Adom
- Role, Senior Journalist, BBC News Pidgin
- Reporting from Accra
One of di most important tins wey pipo dey use for dia everyday life na perfume.
For many pipo, e dey very essential bifor dem go step out.
In fact, without perfume, some pipo say dem dey feel incomplete.
Like Malise Omoloye wey be social media marketing consultant.
Im tok say im no dey step out without perfume.
“Na compulsory for me say I go step out wit perfume, e dey give me ogbonge confidence and ego,” Malise tell BBC News pidgin.
Many pipo dey like Malise, but odas too neva dey care much.
Some pipo too dey forget to use am if dem dey hurry, like Beryl Richter.
“I bin dey use perfume, but sometimes I fit dey forget to use am wen I go rush go town.”
Sabi pipo for di fashion and lifestyle industry tok say good fragrance na accessory for body.
Ogbonge American actress and musician Jennifer Lopez for previous interview say she dey love to wear fragrance sake of “e dey boost my energy for di day, wey I get different perfumes for different moods.”
Pipo like to invest for perfumes and fragrances, dem fit buy plenty for dia wardrobe.
Some dey inspired by di one dia favourite celebrity dey use, wey go make dem wan also wear di same perfume.
From ogbonge designer brands to di odas wey everyday pipo fit afford, di fact be say dis perfumes dey important. But e dey good to store dem inside fridge?
Luxury perfumes dey linked to child labour - BBC find out
Chidimma Adetshina withdraw from Miss South Africa 2024 pageant afta citizenship controversy
Wia dis foto come from, MAISON YUSIF/INSTAGRAM
Yusif Meizongo Junior of ‘Maison Yusif’ manufacturers don create ova 20 custom fragrances wey dey inspired by Ghana rich heritage; wey dey travel beyond di kontri.
Im gat clients wey bin dey store dia perfumes and fragrances inside refrigerator.
Sabi pipo like 'Maison Yusuf' tok say alcohol wey dey inside perfumes (ethanol) get very low freezing point, so e no go freeze inside standard refrigerator if pesin put am inside.
For pesin wey gat experience for creating dis fragrances and perfumes - Yusif Meizongo tell BBC News pidgin say, to store dis perfume inside refrigerator gat im own benefits and bad sides.
Why storing perfume inside fridge na good idea
Recently, pipo on top social media bin dey tok about how dey keep dia perfume inside fridge.
James Ansong begin to dey store im perfume inside im family fridge months ago afta im see one perfumer dey tok about am for instagram.
“Since I start to put my perfume inside fridge, e don dey feel fresh always.”
“I also sabi say di perfume no dey finish fast fast like di time I bin dey put on top drawer for bedroom,” oga James tell BBC News pidgin.
Odas begin dey wonder if di scent from food and oda tins inside di fridge no go enta di perfume.
Wia dis foto come from, MAISON YUSIF/INSTAGRAM
Oga Yusif Meizongo Junior tok say to dey keep dis perfumes inside fridge get impact on top di molecular structure, chemistry and overall scent of di fragrance.
Some of di benefits if pesin store dia fragrance inside fridge according to Yusif include:
1. E dey preserve volatile components
Perfumes gat some chemical compounds wey dey fit evaporate or break down ova time.
To keep dem inside di fridge go slow down di process of evaporation wey im go maintain di fragrance.
2. E dey give protection from heat and light
Heat and light fit break down di chemical bonds inside di molecules of di fragrance - wey im go change di scent of di perfume.
Di fridge dey offer dark, cool environment wey dey protect/shield di perfume.
3. E dey extend shelf life of di perfume
OgaYusif say to dey keep perfume inside fridge dey make am dey last longer.
Dis na becos di temperature inside di fridge go slow down di chemical reactions wey dey cause di perfume to become weaker.
Refrigeration fit make di perfume last longer; for many pipo, na so dey want am, say make e last long.
4. E dey maintain di integrity of di perfume
Environment wey dey cool dey help to keep di original composition of di perfume, by reducing di chance of molecular breakdown.
Dis also fit to cause disadvantage sake of every fragrance gatz to mature - so all di ingredients go come togeda and work wit one anoda well well.
“From experience, we know say di older di fragrance, di better di scent, just like red wine,” oga Yusif tell BBC News pidgin.
Cold temperatures fit to stop di fragrance from maturing.
So you gat to ensure say di temperature inside di fridge wia pesin go dey store di perfume, neva dey too cold.
5. Reduced exposure to air
To store perfumes inside fridge dey prevent dia exposure to air.
Dis dey slow down wetin sabi pipo dey call oxidation - wey be one of di main causes for fragrance to destroy (degradation).
Wia dis foto come from, Getty Images
Side effects of storing perfumes inside fridge
Despite di fact say storing di perfume inside fridge gat many advantages, e also gat some disadvantages.
1. Condensation
If you don dey take di perfume bottle in and out of di fridge, e fit to cause wetin dem dey call condensation.
Di constant temperature fluctuations (small time e dey cool inside fridge, small time you carry comot for heat) go spoil your perfume.
If di fragrance dey hot and dey cold a lot, im dey make di perfume to dey sweat and condensation fit enta inside di fragrance and cause unwanted chemical reactions.
Dis go affect di fragrance ova time and e fit make di perfume lose im actual scent.
2. E dey affect di thickness of di perfume
Colder temperatures dey make liquid don dey become thick; dis fit affect di process of spraying and how di perfume don dey feel for di skin.
3. E fit absorb odour
If you no seal di perfume bottles well well, di perfumes fit to absorb odours from oda items wey dey inside di fridge.
You no want make odour from meat, fish and vegetables to enta your perfume.
If dis happun, e go change di original scent of di perfume.
In summary, di constant cool temperature inside di fridge dey ensure say di perfume bin dey stored for “optimal environment, wia dey free from fluctuations wey don dey happun at room temperature.”
Yusif Meizongo Junior, di perfume expert, say you gat to leave your perfume inside fridge (if dat be how you wan do am) until im go finish. If you interchange di temperature, den condensation go happun.”
Im tok say “make sure di bottles dey tightly sealed so dat e go prevent condensation and odour absorption.”
As tins don dey clear now, you fit to decide wetin you go do and how you go store dat perfume wey you carry moni take buy.
Na your choice!